abaruuji cellal ɓalli nder falde Linngeer.  Yontere no woorunoo waɗanoo-ma ngam hokkirde harkilaaji tookaaɗi. Ɗum noon waɗi ko ballal pelle biyeteeee "Network" e "Usaid" kono kadi e ballal jaagorgal kalfinangal cellal ɓalli nder leydi Senegaal. Hade harkilaaji ɗi hokkireede, waɗano njillu ngam humpitaade kala galle hol no foti mbalndiiji ngoni heen mbele eɓe mbaawa feccude ɓesngu fof ko ina yona ɗum. Kala mbo ɓe ndewi maa ɓe ngoppuɗoon kaayitel kolliroowel wonde ɓe ndewiino ɗoon (ticket).

Nde ɓe njotti e tottirde ɗiin harkilaaji, ɓe mbaɗi ko leegal e leegal (hannde ko leegal lislam, janngo ko dental.....); kala heen leegal jontangal maa ɓe njuɓɓin jeewte ngam hollirde harkilaaji ɗi nguppirtaake conndi saabunde (Omo) wolla ndiyam mbiyeteeɗam ɗam orda-sawel (Eau de javel). Kadi ɓe kolliri ɗiin harkilaaji ɗi potaani yeeyeede. Ɓe kollitii kadi kala mbo ina leloo etee ko jogorrɗo ɗaanaade yo haɓɓu harkille mum! Woni faandaare mum'en mawde ko riiwtude jontinooje haa laaɓa cer !!! Ndee ñalaande hawrunde 09/06/2012 yontano ko leegal ina wi'e Jaksaaw: ko kanngal heedi reewo wuro Daara ngo. Tawtaranooma yimɓe heewɓe sanne, ko ɓuri heen heewde ko rewɓe kam e sukaaɓe. Galle cafrirɗo mbo Daara (District santaire de Dahra) ariino e ñalaande nde e innde  Docteur en chef o hono Buuna Njaay. O ƴetti heen konngol ngam hollude weltaare makko e eɓɓoore ndee e faayiida mum, kedoɗen Buuna najaay doktoor mawdo oo, e Saasi Kah  gooto tawtoranooɓe ɓee.