Ejipt ngoni laamɓe fuku, sikke alaa caggal poolgu maɓɓe laabi tati dewondirɗi e kawgel Afrik (caggal 2006, 2008). Hikka, gila kawgel puɗɗii, yiyaaka ɗo ɓe paayi walla ɓe kuli. Kawre maɓɓe fof ɓe nawtii, ko yeewi heen e alluuje jaajɗe haa teeŋti e kawgu maɓɓe e Alaseri (4-0). Fetto maɓɓe hannde Ganaa heɓaani tolno kawral maɓɓe e Alaseri walla Kameruun, kono ɓe mbaɗii ko waɗɗinoo-ɓe so hawde hay so alluwal daɓɓal (1-0).

Haala gasii, Ejipt tawtii Ganaa e battanal kawgel Afrik fuku caggal poolgu mum laaɓtungu e dow Alaseri (4-0). Ko waalde wootere fetti ngal kawral, woni Ejipt sabu hey gooto heftinaani Alaseri gila fetto ngoo hurmi. Hakkunde maɓɓe ko pottital yoftaare caggal nde Alaseri ɗawi Ejipt tikket mum fayde Kawgel Winndere to Afrik Baŋnge Worgo e lewru Jolal 2009!

Gyan taccinii Ganaa!

Ko hannde anndetee holi jogorɓe fooɗondirde karaŋ Afrik Ngenndije ñalnde 31 Siilo to Luanndaa. Ko Ganaa adii heɓde tikket mum feewde e baban kawre. Ɓe piyi Nijeriyaa e kikiiɗe hee 1-0. Ngaari majjiri yonii e ngal kawral ngal teskortaake wonde jooɗngal Alla e sippiro doole heewde e mayre! Ganaa ɓuri hannde anndude haaju mum sabu ko e rogere adannde ndee ɓe naatni ngootiri maɓɓe! Ko e hoƴom 20 Ganaa heɓi korneer. Ko Asamoah junniti bal e gallol Nijeriyaa. Gyan addi ngaallo peewɗo, sokki bal e gaccungol Enyeama (1-0).

Ko hannde ceeɗi-ɗen yuman golwole hakkunde Alaseri e Kodduwaar, fooɗondirooɓe taccugol e ndee nayaɓiire! Kodduwaar hollii mbaawka mum e kawre gadane ɗee, haa taccugol maɓɓe e rogere ndee-ɗee waɗaani caɗeele no feewi. Ena ɗaminanoo wonde hare maɓɓe e Alaseri ko bonnde wonata sabu Alaserinaaɓe tacci ko e muuseeki e kulol! Ndeen bal oo hurmii, Kodduwaar hartii, yiɗi bettude Alaserinaaɓe. Kono baluuji keewɗi nduuñtaama. Alaseri yiyaaɓe nde fuɗɗii hawjude seeɗa e kulhuli naatneede ngaari ko lawɗi e kawral ngal.

Haala maayi! Anngolaa jeyaaka e hawooɓe hikka e kawgel Afrik fuku caggal nde ɓe piyaa Dewo 24 Siilo. Ngati goddi Palancas Negras en taƴii gila hoƴom 16 nde Gyan naatnani Ganaa ngaari mbajjiri kawral ngal. Ko ɗoo ngolwole Anngolaa kaaɗi hikka hay so leydi fof no woorunoo ena caggal maɓɓe gila kawgel ngel fuɗɗii. Gila ɓe kurmini fetto ngoo, Anngolaa ummanii ko waɗde feere fof haa waasa addude nimsa e keydi ndii. Ko ɗum waɗi eɓe mbayi hono hulɓe seeɗa. Ganaa fuɗɗii hartaade sabu ɓe Paamii Anngolaa yiɗi ko yahrude hakkille.

Yerɓannde leydi yande e Port-au-Prince, laamorgo Haytii addii boomaare e bonanndeeji toosɗi e miskineeɓe leydi ndi. Waɗii duuɓi 200 ko Haytii yiyaani tanaa potɗo hono nih. Alaa huɓeere dariinde hannde e wuro ngoo! Fofof fukkiima e leydi haa teeŋti e kuɓeeje laamu: Galle Laamorgo leydi ndii yanii, bonii, hoɗotaako! Opitaaluuji, duɗe janngirde, jehe ekn, alaa ko heddii e mum'en so wonaa joowe kaaƴe e tuufeeje!