Tabital Pulaaku Farayse / Catal Tijjaani Aan yuɓɓinii hiirde fulɓe ñalnde 18/10/2008 ɗoo he Korbey Eson he leydi Farayse. Ndee hiirde yuɓɓinaa ko he teddungal naalaŋke pullo, mo yonta kaa waɗti hakkille mum: woni Mammadu Dem mo diɗɗal Fuɗnaange looti. Hiirde ndee rentini pelle pinal, gure, naalaŋkooɓe, yimiyaŋkooɓe, wammbaaɓe, yimooɓe pekaan, yimooɓe leele, jimɗi sukaaɓe,wejo pulaagu, yimooɓe Riɓ-raɓ pulaar , ñaantule pulaagu e hirjino fayde he ɓamtaarre.

Arii ɗoo elaaɗo Tabital pulaaku Farayse, Tabital Pulaaku Etampe, Tabital pulaaku Miiroo, Tabital Pulaaku Pari,Tabital Pulaaku Orleyaa,Tabital pulaaku Joonwiliyee, Fedde Kayhayɗi, Fedde Aañam Yeroyaaɓe, Jaaynde Konngol Pulaaku, Fedde K.J.P.F Mantu-laa-jolii, K.J.P.F Nuwaasii lo sek, Fedde Hawwaa Daabo to Miiroo, Fedde Aamadu hampaate Bah to Tarap e ngenndiyaŋke men biyateeɗo Jinndah Dem.
Hiirde ndee udditiraa ko jimol sukaaɓe: ALMUDEL AM e ballondiral Katante Leñol Kan, rewi heen ko yimre Ceerno Mammadu Saydu Woon mo Lugge Saybooɓe, Jimol njuulee mo wuuri ngol Daawuuda Sammba Jeey. Caggal ɗuum ko konngol hoyreejo catal ngal hono Katante Leñol Kan:
"Banndiraaɓe Fulɓe, on calminaama kadi on mbismaama he hiirde catal Tijjaani Aan ngal fedde Tabital Pulaaku Farayse ɗoo he Korbey Eson. En mbaawatah haalde nguurndam catal ngal tawa en puɗɗoraaki siftin'de banndiraaɓe aafngo Kawtal Janngooɓe Pulaar. Kawtal aafaa ko hitaande 1981 to Bordoo. Catal Tijjaani Aan aafaa ko 07/08/2005 . Ngal heɓtinaa to laamu ko ñalnde 25/11/2005. Catal ngal adii ko waɗde heblo jannginooɓe fotde yontere he ballal ceerno Mammadu Abdul Sek mo K.J.P.F Mantu aa jolii. Ko ndeen ngal waɗti janngin'de he kala Dewo. Rewi heen ko juɓɓin'gol ñalngu pinal he teddungal ceerno Yero Dooro Jallo ñalnde 25/11/2006, rewi heen Hiirde pulaagu ñalnde 17/07/2007. Rewi heen ñalngu pinal he teddungal Ceerno Aamadu Maalik Gay ñalnde 17/11/2007. Golle catal ngal ena njokki haa ñalnde 26/04/2008, tawingal heɓii terɗe 63, ngal felliti naatde he Tabital Pulaaku Faraysengam jokkaade he Tabital Pulaaku winndere. Darnde catal ngal ko janngin'de ɗemngal fulfulde, hollirde pinal pulaagu e jokkude enɗam Fulɓe. Catal ngal ena gollodoo e cate Tabital Pulaaku Farayse e kala fedde nde fayndaare mum en hawriti. Catal ngal enajanngina kala Dewo tuggi njamndi 16 haa 18 - 00.

Dentaangal dille fedde ndee ko yarlitaare.Catal ngal gollodiima e yarlitaniiɓe leénol ngol heewɓe yarlitaare terɗe, golle e ngalu, Jaaraama Jaalo Sek, Sayku Umar Bah, Ismaa'iila wan Sammba Sare, Hawo Fay, Maamuudu Deh, Ibraahiima Abuu Sal, Mammadu Cubbu, Mammadu Dem, Iisaa Cubbu, Daawuuda Jeey, Muusaa Joob, Mammadu Lih, Sammba cooyel Bah, Modeel Gise, Kaadiri Yaayaa, Yaayaa Bah, Aamadu Jah, Arwaa Golloko, Mammadu Saydu Woon, Hawwaa Daabo, Maajaw Soh, Mansuur Ngaydo, Jinndah Dem, Ceerno Aamadu ɓan, terɗe fedde ndee, Maamuudu Lih, Usmaan Bammbaaɗo, Meeri Koybey, Meeri Eefrii e dentaangal fedde, catal walla teelɗo mo min meeɗnoo waɗdude ñalaande. Hiirde hannde ndee ko ruttude gollidanooɓe ɓee teddungal, kono ko min jokkuɓe golle, etee amin udditi jokkondiral faydi he ɓesngu Fulɓe e yiɗɓe mum en. Ko adii nde mbaynatoo mi, miɗo jaara dentaangal yimɓe catal ngal ngam yiɗde, golle e nuunɗal mum en, mi teeŋtina jaaroore fayde he ceerno Maamuudu Lih gonnooɗo hoyreejo catal ngal gila nde ngal ɓurnoo saɗde ɗowde. Mbaynortoo mi ko yimre am wiyateende Alhajji Tijjaani Aan. Jooni, mi waɗta golle ɗee he juuɗe kalfinaaɗo Pinal hono Maamoo Arɗo Soh. On njaaraama."

Maamoo Arɗo Soh: "Banndiraaɓe, on calminaama, on mbismaama he golle ɗe ndennduɗen, ngati fayndaare, men ko wootere. Caggal konngol mawɗo catal ngal, ngartat mi ko he jaarde dentaangal yimɓe fedde ndee haa teeŋti he goomu pinal ngu ngollodii mi fotde daawal juutngal hannde.Miɗo teeŋtina bismaango am fayde he pelle walla heeriiɓe, ngam nootoraade keewal e addude heen baɗle e peeje juumtuɗe. So en kawrii ɗoo hannde, ko ngam yiɗde e yarlitaare men, kono kadi maa mi yettu sabaabu hono Mammadu Dem gaddanɗo en miijo e yarlitaare haa ndee hiirde laatii hannde.Miɗo ñaagoo Geno moƴƴo oo nde hiirde ndee yahrata no haaniri kadi mbaɗten nii mo nwuuri. Jooni en naatanat golle, ɗowgol ngol noon, miin e cukko am Hajji Mbay e dentaangal goomu pinal Tijjaani Aan, min teddinirii ɗum: Ceerno Sammba Cooyel Bah mo Jowol e Ceerno Mansuur Ngaydo mo Horkaƴere. On njaaraama."

Caggal nde jom pinal rowi haala mum, Mammadu Aamadu Lih jubbii he nguurndam Tijjaan Aan, Model siftini yimɓe ko ɓooyi, Haamiidu Bookum e Hammadi ɗaahara Kulibali, kartii jime pulaar, Muusaa Joob luuki riɓ-raɓ, Iisaa Cubbu iirti bayraaɗi, Usmaan Bammbaaɗo Bah falindii gaaci jahduɗi e luukaango fantaŋ. Ko ɗoon Mammadu Dem naati dingiral ena duusaa jokkolɓe, lamɗam yonta ardii e ñaragal pulaagu, daande no joolooli, mbaydi cayndi e gowlaali cañiiɗi haa gooto kala yiytii hoore mum. Daawuuda Jeey artirii dental ngal he yonta waala-fenndoo, o suɗiri mum pekaan, Model jirgiti dingiral ngal, Iisaa Cubbu, Muusaa Joob e Abuu Bah mbaɗdi daaɗe gelooɗe. Ko ɗoon ɓerɗe kooti Afrik hakkunde Salndu Fuuta e Nganno, Katante leñol ollii daande leele, sukaaɓe njerminii, mawɓe njiili koye, ɓe miijii haŋki. Ko ɗoo tonngaten ciitol hiirde Fulɓe to Korbey Eson, ko heddii koo njokkitiren ɗum jeeɓoygol leppi mum garooji. Yoo en mbaɗu nii mo wuuri. On njaaraama

Tags : pinal, tabital pulaaku farayse, corbeil essonne, culture peule, pulaaku, mamadou dème

Evaluation utilisateurs

   (1 vote)

Affiche 8 de 8 commentaires