TABITAL PULAAKU: Ciimtol batu jagge yiilirde to Bamakoo, Maali
Dernière mise à jour : ( 05-12-2008 )
 

Ecrit par Administrateur Pulaagu.com, le 05-12-2008 10:48

Pages vues : 4921    

Publié dans : Les News, Pelle e dente


Image
Tijjaani Mbaalo, TPO
Banndiraaɓe tedduɓe, batu jagge Yiilirde TPW fiɓaama to laamorgo Mali ñalnde 8 e 9 /11/08. Tawtoraa e nguu batu ko jagge jeyaaɗe he ngenndiiji ceertuɗi he ndeer duungal Afiriki e diɗɗal ɗanniiɓe wonɓe he duungal Orop. Batu nguu udditaa ko ñalnde 08/11/08, udditi batu nguu ko Cukko Hooreejo Tabital Pulaaku Mali, Dr : Usmaan Bah, o yetti banndiraaɓe arɓe e tawaaɓe, o wii : On iwii to mon, on arii to mon, yoo Geno wallir Fulɓe kawral e paamondiral.

Nde o gayni, ko jaggal kalfinanoongal fiyaakuuji boowal ngenndi Mali ndokkaa konngol; woni Uamru Usmaan Dikko, oon kadi yetti terɗe Tabital Pulaaku garɗe tawtoreede nguu batu jagge Yiilirde TPW, o  yetti Fulɓe kala ɗo mbaawi wonde he winndere ndee, o wii :

Hiɗen tami golle caɗtuɗe e tiiɗɗe laatingol, ngam Fulɓe na tawee he kala nokku he winndere ndee, kadi keeweendi he maɓɓe faamaani ko maa ɗemngal men winndee, janngee, pinal men ko maa ŋellitee, anndee he ndeer ndee winndere. O gasnitori konngol makko ko yettude e ñaaganaade arɓe ɓee yoo ndutto he jam, tawoya jam, yoo tawaaɓe muñ, nduusa ɓe jam e teddungal.

Caggal makko ko Hooreejo Tabital Pulaaku Winndere ndokkaa konngol, o yetti banndiraaɓe men Malinaaɓe he teddungal pulaagu ngal ɓe njaɓɓorii banndiraaɓe meɓɓe Fulɓe, o yetti Fulɓe nootiiɓe he nguu batu, o rewni heen banndiraaɓe arɓe nootaade nguu batu, ɓe annduɗaa alaa ko addi ɓe so wonaa yiɗde leñol maɓɓe, o yetti Ceerno Kaadiri Yahyaa, yettoore heeriinde, ngam alaa batu noddaangu ngu o tawtoraaka.  O wii maa Kolaaɗo Kuuɓal Tabital Pulaaku Winndere rokku jagge e terɗe Yiilirde Tabital Pulaaku Winndere toɓɓe batu nguu.

Nde o gasni konngol makko o wii : Jonnde ndee dartinaama haa janngo, ko nii min caakorii, heddii terɗe garɗe e tawaaɗe na njettondira, na ngostondira jiiɗe he ko feewti he n

Image
Alfaa Aamadu Jallo, Hooreejo TPW
juɓɓudi Tabital Pulaaku Winndere e toɓɓe batu nguu.

Minen penngal Tabital Pulaaku Orop, Hooreejo wii, yoo min ar min kirtodoya e makko to jippunnde makko, min njahdi e makko, nde min kirtii, min nduttii to jippunnde amen, kono gila batu nguu dartinaa to jippunnde Nord- Sud, alaa ko woni yeewtere yimɓe ɓee; ko wonaa caɗeele Senegaalnaaɓe, ngam gila Tabital Pulaaku Winndere sosaa haa hannde,  ngal woni ko he caɗeele luural Senegaalnaaɓe, ngam ngol laawol kadi ɓe ardi ko e luural maɓɓe, woni luural hakkunde Hooreejo Tabital Pulaaku Senegaal ; Mammadu Alasan Bah e Cukko Hooreejo gadano, Hamediin Sih, ko he moƴƴere mawnde, nde Geno yeɗi Fulɓe min mbaawi heɓde kawral ngal ina wela penngal Senegaalnaaɓe.

Ngaal kawral woni : yoo Hamediin Sih heddo Cukko Hooreejo Tabital Pulaaku Winndere e innde Senegaal e nguu batu, ngam Hooreejo Tabital Pulaaku Senegaal; Mammadu Alasaan Bah winndaano ɓataakuru faade e Kolaaɗo Kuuɓal Tabital Pulaaku Winndere ko adii, ko he nguu batu ɓe addi ɓataakuru waylital Yiilirde Tabital Pulaaku Senegaal.

Ñalnde 09/11/08, min ari he jippunnde Nord-Suud, min puɗɗitii batu nguu he njamndi 11:00, min puɗɗorii  ko laartude golle kawranooɗe no ciiniraa tuggude he ñalnde 30/11/07 haa ñalnde 12/11/08.

Hiɗen anndi he batu TPW waɗnoongu ñalnde 19 e 20 /10/07 miijooji keewɗi ɓaŋanooma e maggu, na jeyaa he ɗiin miijooji arooji ɗoo ɗii :

1) Goomuuji golle, yoo terɗe mum timmine. Ndee ɗaɓɓaande waɗi nde tan ko : Mali, Senegaal, Muritani e diɗɗal ɗanniyankooɓe wonɓe he duungal Orop.

2) Tabital Pulaaku Mali, hawranooma yoo ngal neldu kaaytaaji ceedtoriiɗi jeyal galle TPW, denndaangal cate Tabital Pulaaku Winndere, ngal waɗii.

3) Diɗɗal ɗanniyankooɓe Aasiya, Ciina, mbi’iino maa ɓe mbaɗ no galle ɗee mahirtee e fotde mahoore galle ɗee, kono ɓe mbaɗaani.

4) Hawranooma yoo goomu tedduɓe suɓe e ndeer cate TPW, ɓeen ndaroo haa TPW heɓtinee he baale (pelle) winndere, kono ngal gollal waɗaaka.

5) Hawranooma, yoo TPW yuɓɓin koolol to ngenndi Senegaal, ngaal gollal siinaama, hay so tawii wonaa he njimaandi TPW ngal siinaa, nde tawnoo caɗeele keewɗe kawraama heen.

6) Hawranooma yoo Hooreejo  TPW yottin hooreeɓe teddiniraaɓe teddungal Fulɓe woni ; Hooreejo ngenndi Senegaal Abdullaay Wadda e Hooreejo ngenndi Mali Aamadu Tumaani Turee, kono ngal gollal waɗaaka tawo.

7) Hawranooma yoo waɗe he ndeer koolol TPW he ngenndi Senegaal njeenaari Yero Dooro Jallo, he suɓsuɓo daɗondiral naalankooɓe fulɓe, kala ceeyɗo rokkee ndi, kono waɗaaka.

8) Hawranooma, yoo limto (abjada) fulfulde  wootinɗine, kono ngal gollal waɗaaka. Hay so tawii Catal Tabital Pulaaku Beljik tawniino hikka e nder koolol mum, waɗde jonnde (ataliyee) wootinɗingol Fulfulde.

9) Hawranooma, yoo doggol diɗɗe naalankooɓe fulɓe, toɗɗe  e kala diɗɗal daraniingal pinal fulɓe heɓtinaangal, yoo nelde Kolaaɗo Kuuɓal TPW, kono ngal gollal waɗaaka.

10) Hawranooma, yoo lowre (WEEB) Tabital Pulaaku Winndere waɗe, ngal gollal halfinaa Mammadu Jan Jallo, ngal waɗaama.

He nguu batu, min kawrii he geɗe kakindiiɗe, woni ɗee ɗoo :

1) Goomu hirjo, halfinaangu yottinde Tabital Pulaaku he denndaangal koɗanɗe Fulɓe ɗo ngoni he winndere ndee suɓaama, halfinaa ngal gollal ko Buubakar Baalnde e wallondirde e Hooreejo TPW e hooreeɓe cate ngenndiiji e baale ɗanniyankooɓe yaasi Afiriki.

2) Mahugol jooɗorde TPW waɗtaama e juuɗe Tabital Pulaaku Mali, ɓeen cuɓike Aamadu Siisee, yoo ardo golle ɗee, o fodii maa o waɗ gollal ngal, so o gaynii o hollita TPM e Hooreejo TPW. Yoo o feññin he eɓɓoore mahugol jooɗorde ndee; fotde waawoore mahde jooɗorde ndee, ɓaawo ɗuum  jooɗtee pawee e alɗuɓe fulɓe e ko Alla waawni Pullo e giɗo fulɓe pewjee njeewtee he ndeen jonnde. 

3) Yiilaade no Tabital Pulaaku Winndere, heɓtiniree he ndeer baale winndere hawraama yoo fuɗɗite, he ndii mbaadi kala catal he ndeer duungal Afiriki walla waaldeere (fedde) ɗanniyankooɓe yoo toɗɗo ko ɓuri yaawde yimɓe jeyeteeɓe he nguu goomu, haa ngu waɗa golle maggu ko ɓuri yaawde.

4) Goomu juɓɓingol lelngo jannde fulfulde toɗɗaama woni : Dr : Timoree Culentaa e Dr Isaa Jallo e Ceerno Tijjaani Mbaalo, maa ɓe lelnu kalfe (kelme) caltuɗe Fulfulde mbaawteeɗe jannginireede no cuɓtiraa he ndeer ngaddinaaji caltuɗe ɗee, tippude e ballondiral e annduɓe goo. 

5) Lowre ndee, hawraama yoo ceede mum yaltine, golle mayre fuɗɗoo.

6)      Hawraama, yoo ɓataakuru Senegaalnaaɓe jaabite, ndu ɓe addori he batu jagge yiilirde TPW, fiɓaangu ñalnde 8 e 9/11/08 to Bamako, he ndii mbaadi yoo Hamediin Sih heddo Cukko Hooreejo, haa nde yiilirde wayloytee he hitaande 2009, he oon yonta TPS toɗɗoto neɗɗo gonoowo Cukko Hooreejo TPW to Senegaal.

7) Hawraama, yoo Dr Fari Silla Kah winnde ɓataakuru anndinee ko kanko halfinaa jannde TPW.  8)      Hawraama fiyaakuuji waaldeere ɗanniyankooɓe fulɓe wonɓe he duungal Amirik, yoo heddo he juuɗe Hooreejo TPW.

9) Hooreejo wellitaama he suɓaade terɗe ɗe waawta gollidude he yoga he golle, ɗe o muuyi waɗde. 

10) Hawraama fiyaakuuji jiiɓduuji Senegaalnaaɓe, ko yoo Tabital Pulaaku Winndere yaltu heen; foti ko yiilirde maɓɓe walla ko golle baɗaaɗe he koolol maɓɓe.

11) Ɗee golle cuɓaaɗe e ɗii goomuuji toɗɗaaɗi, kappanaama haa ñalnde 31/01/09.

Nde ɗee golle ƴeewtaa, min tawi ina saɗti wiide na yeewta toɓɓere wonnde hoore batu nguu, woni honno jooɗorde Tabital Pulaaku Winndere mahirtee ?. Ko nii min yahri he cariika, na jeyanoo heen galle pinal Fulɓe , ko ɗoon Hooreejo Tabital Pulaaku Orop rokkaa konngol, min ciimtani ɓe no miijo galle pinal Fulɓe ardi e no fuɗɗorii, gila he kawtal haa e hanndeere ndee.

Nde o gasni Ceerno Sammba Turee rokkaa konngol o yetti banndiraaɓe ɓee, o yottini ɓe eɓɓoore galle pinal Fulɓe e to nde yahrata e ko miijaa heen, o anndini ɓe galle pinal Fulɓe woni ko he njiimaandi Tabital Pulaaku Winndere, kono Tabital Pulaaku Orop na ñaagii, nde ɗowgol golle ɗee mbaɗtetee e juuɗe maɓɓe, o anndini ɓe  maa Tabital Pulaaku Orop daro laara no ndee eɓɓoore siinirtee.

Nde o gayni tawtoraaɓe ɓee piiw (foppet) e terɗe Tabital Pulaaku Winndere fof mbeltii he eɓɓoore ndee, ngo jaɓaa, ngo wonti jeyaango he eɓɓooje Tabital Pulaaku Winndere. Kadi min kawri yoo goomu suɓe, huuwondiroowu he Tabital Pulaaku Orop.

Nde min ngayni ndee toɓɓere, penngal ngenndi Gammbiya ƴetti konngol, o haali darnde nde Tabital Pulaaku Winndere foti daraade, ngam hanndeere ndee en alaa ko ɓuri Tabital Pulaaku Winndere, o wii o jaɓii gollal ngal o halfinaa ngal maa o waɗu fehre e mbaawka makko no gollal ngal laatorta.

Caggal makko, leƴƴanɗe (jowe) e konnguɗi hirjo mberlaa, nde ɗuum gasi batu nguu dartinaa, tawi kadi ñallii, min njahi ñaamirde, min mbottoyii (soƴƴoyi), penɗe garɗe e tawtoraaɓe piiw ndenndi he ñaamirde wootere. Ndii bottaari ko Hooreejo yoɓi ndi. 

Ko nii miin e Sammba Tuuree e Mammadu Jan Jallo, min njahi locitoyde galle pinal ngenndi Maali, tawi miɗen (minen) tami toon fodoore, nde min njottii min tawi cukko jiiloowo golle galle pinal ngenndi Mali Saydu Silla na sabbii min, nde min njottii o jaɓɓii min sanne, o jaɓɓorii min ko jaɓɓo ganndal e enɗam Afrikyankaangu, o haalani min no daartol galle pinal ngenndi Mali fuɗɗorii e ko galle ɗe soomi he pine e tawaa-tawi leƴƴi Afiriki, nde o gayni yeewtere makko, o yillini (jinndini) min e yoga he cuuɗi pinal galle ɗee.

Kala suudu ndu min naati o haalana min ko woni he mayru he pine e tawaaɗe e leñol keeroringol ngaal pinal walla oon tawaa-tawi, min keɓi heen ganndal e humpito, ngal alaa happu ko feewti he pine e tawaa-tawi leƴƴi Afiriki.

Nde min ngayni min kooti to jippunnde Hooreejo, ko ɗoon min ngoni haa yahdu wiirirde-laaɗe yonti, min kuccani Senegaal,  miin e Sammba Turee e Hooreejo Tabital Pulaaku Winndere, tawi himin njeewtida he Hooreejo he ndeer awiyon hee ko feewti he fiyaakuuji e caɗeele Tabital Pulaaku. 

Banndiraaɓe tedduɓe, ɗum ɗoo ko seeɗa he ciimtol batu jagge Yiilirde Tabital Pulaaku Winndere, min njettii banndiraaɓe men Malinaaɓe e denndaangal ɓiɗɗo pullo e giɗo Fulɓe to woni he winndere ndee.

Miɗen njaarna terɗe Tabital Pulaaku Orop he pellital maɓɓe e darnde maɓɓe fii no ɗemngal men yahira yeeso e no pinal men ŋellitora he winndere ndee. Yoo Geno addu kawral e paamondiral haa poolen humambinnaagu he ndeer renndooji Afiriki.

On njettaama.

(www.peeral.com)


   
Citer cet article sur votre site
Favoris
Imprimer
Envoyer à un ami
Articles similaires
Enregistrer sur del.icio.us

Commentaires utilisateurs  Fil RSS des commentaires
 

Evaluation utilisateurs

   (0 vote)

 

Affiche 9 de 9 commentaires

Jamma ; jamma daccaa ceedhu

Ecrit par: galguumel (Invit ) le 05-12-2008 23:18

Sikke alaa to biy pullo waali e winndere hee fof ina sok'lani ngol lenyol ; lutti ina foti daranaade e wallude ngam ndee fedde daraniinde jellit'de pulaagu yahra yeeso.Yoo GENO won ballo kadi o yoba bee worbe e rewbe fulbe wadbe ngol lenyol ngoja mum en; be kaawanaaki en doole mum en darnde mum en.En njettii Tabital Pulaagu Mali e golle mum en e teddungal mum en; kono en eew'niima(En nyaagiima) Tabital Pulaagu Senegaal:En nyagiima be nde be njawtata luure mabbe, be kaaltida e koye mabbe,be njahfondira be ngon'ta neddo gooto ngam be ngadda ballal mabbe e lenyol ngol ina hatojinaa no feewi sanne

 

» Signaler ce commentaire l'administrateur

weltaare e suumaare

Ecrit par: demmba wan mo jowol (Invit ) le 06-12-2008 08:18

weltaare mawnde fayde e tabital pulaagu yo alla addu kawral e lenyol fulbe.ko heewi liggama kono ko heewi ina heddi tawde annduube lenyol fulbe ina ndokka hawriide ina hulbiini nofeewi.mbodo wiy tabital pulaagu senegal yo mganndu senegal wona caggal leyde fulbe.sabu e hitaande 1966 to bamako mali nde aduna o fof hawroy toon yewde no pulaar janngira senegal ina tawtora.kono tiggi hitaande 2000 ha 2008 seneegal ina heewi cadeele.cadeele leydi fulbe ina usta doole fulbe.yo alla won ballo.winndi ko ekkiyakke binndo demmba jeewo wan mo jowol mi yafniima fulbe so sellaami.

 

» Signaler ce commentaire l'administrateur

BOTTOOWO MAAYDO YURMAAKI DUM

Ecrit par: Abdul Amadu Kelli (Invit ) le 06-12-2008 21:52

Tabital joodiima e no woownoo wadande en e kala hitaande,be njaaraama ko Allah jogii njobdi yoo yobbe njobdi moyyiri!!!dee golle e ndee darnde ene heewi wadde tawa kadi ko kambe bee doo mbadi dum,dum noon sinno enden njogii ko buri oo Allah yob,yoo yettin paandaale men,ma en mbiyatno noon, kono ko duum njogiden,ko noon kadi mbiyden!!!jogiibe luure e yidbe wadde koye mumen tawa mbadaaka,been ngonah feewnoobe,be ngonah fotbe wadeede huunde,won ko be njidi,nde be kebi dum fof be ndartintu golle mabbe e fedde ndee,dum noon pamaro gondi biiñata ko law,so be nduttaaki,holto be kalfine e be mbonna!!!

 

» Signaler ce commentaire l'administrateur

JUBBANNDE HE YIMRE TABITAL PULAAKU

Ecrit par: KATANTE LEÑOL KAN (Invit ) le 07-12-2008 02:18

Katante leñol Kan doorii, yoo mal Fulɓe keɗtaagu 
Tabital pulaaku winndere, Fulɓe laaɓndii ko ngootaagu... 
 
Jaaraama pelle gila law paamnooɗe tooke peccaagu 
Ndetr leyɗe haa to boowal njarlitii fadde hay ndahgu 
Ɓeen ferɓe laabi dental, ndentiniri Fulɓe ngawlaagu 
Ngaddinaaji men so keewii, riiwaani Fulɓe ngootaagu 
 
Nuunɗal he renndo tigi-rigi holli ko waawde ngardaagu 
Kala eɓɓo, goomu rewindoo, ciimti mum njooɗa ngartaagu 
Kaalirɗe haa e ayawooji ngenndi kala eɓɓa ngoodaagu 
Tabital Pulaagu yoo mal kala mbaydi renndo ɓamtaagu 
Hay gooto hannde faltaaka, Tabital ko ɓuuɓri jammaagu.

 

» Signaler ce commentaire l'administrateur

Batuuji limtaama

Ecrit par: jjj (Invit ) le 13-12-2008 11:54

Eskey ko fulɓe ko, ngol laawol foti haasteede, holi nde gollal jogori naataneede, mate ngol lenyol kam alaa annduɓe, hatanteeɓe tawa njiylaaki innde e ngalu? TPW reewtii e dappe Kawtal batuuji duuɓi noogaas; so reenaaki ngelooba yeeyee coggu tame. Ngaanumma waɗii nde guppoowo tuutata e juuɗe mum.!!!!! :?

 

» Signaler ce commentaire l'administrateur

bus hersi

Ecrit par: demmba wan mo jowol (Invit ) le 15-12-2008 13:28

bus hersimaama e nder renndo so fiyeede pade ina hersini kono neddo ko liggi fof ina haani yobeede wadde bus sakkotoriima ko soofi walla ko moyyaani

 

» Signaler ce commentaire l'administrateur

culture peule

Ecrit par: ahmed (Invit ) le 28-03-2011 20:06

la place , l'usage et le message de l'écriture corporelle peule

 

» Signaler ce commentaire l'administrateur

culture peule

Ecrit par: ahmed (Invit ) le 28-03-2011 20:12

la place , l'usage et le message de l'écriture corporelle peule

 

» Signaler ce commentaire l'administrateur

appréciation

Ecrit par: GADO Worou Kéido (Invit ) le 16-06-2011 17:15

j'apprécie beaucoup l'initiative et je souhaiterais qu'elle soit étendue dans d'autres pays. je suis peul béninois et j'aimerais vraiment connaitre la culture des peulhs. je vous remerci et longue vie à pulaagu

 

» Signaler ce commentaire l'administrateur

Affiche 9 de 9 commentaires



Ajouter votre commentaire
Nom
E-mail
Titre  
 
Commentaire
 
Caractres restant: 2000
   m'avertir par mail si ce commentaire est suivi
  Veuillez rpondre la question:
1G8         KDS      
  O    C    D O   138
ALS   H6P   L 7      
  T    S    T H   BU2
D2K         LQR      
   
   



mXcomment 1.0.7 © 2007-2014 - visualclinic.fr
License Creative Commons - Some rights reserved