gam safaara e golle diine ɗee e jokkere enɗam, Ceerno Ahmad Tijjaani Bah mo Madiina Gunaas, immaniima njillu mum, no woowi waɗde e ɗii duuɓi fof nii to Farayse; o hirnde Dakaar jofnde alkamiisa 12/07/2012.
Jaɓɓungal. E jettagol makko to diwirde Orly worgo, caggal o waɗii ƴaaŋtel to Marok, o tawii dental ngal e iwrude e ceŋɗe leydi Farayse ndii, haa e leyɗe Orop takkiiɗe ɗee, fof o tawii ɓe ɗoon aɓe njaɓɓii, e dow korsa e yeewnude e njoorto moƴƴo to ɓeyditondiral alliyankeewal e kum-tale haajuuji gondaaɗi fof. Midi haa waktuji tati kikiiɗe,

Ceerno e banndiraaɓe ɓee ina ngondi e diwir-de hee, ngam salmondirde, yi’dude e juurondirde, haa o juuldi e maɓɓe ɗoon salli fanaa oo. O duwondiroyi e maɓɓe, gooto fof ruttitii e golle muuɗum. Sete makko oo ɓenni to jippunde too, Vernon, tawi kanko alhaali waɗi ko yo o waal ɗoon e Pari ngam aadi makko e safrooɓe ɓee.. O yettitoyii Vernon kikiiɗe janngo muuɗum, o wirdidi e banndiraaɓe ɓee Asru aljumaa oo ; tawi aɓe ngari e keewal ngam wiri-didde e makko oon ñande..

Gooto fof e haaju mum.
Gila o naati leydi ndii, golle ina njokki tan ; banndiraaɓe ceeraani e arde yettondirde e Ceerno e gollon-dirde e mum e ndaartude kumtal haajuuji; gila e golle, dewle, sukaaɓe, teeŋtii e kaayitaaji. Ngati won wonɓe gaay ko ɓuri duuɓi 10, haɗi ɓe hootde to men ko ɓe ngalaa kaayitaaji.. Ceerno kanum ne, ina jokki e hirjinde yimɓe ɓee e diine hee e tijjaaniya hee ; ko ɗum waɗi sa’aa fof nanngooɓe wirdu ina ngoodi, fammintooɓe e diine hee e laaɓtintooɓe geɗe nguurndam mu-men ñande-fofiije.

Hannde, e oo talaata, o jaɓɓiima ɗoo e fuwaayee Adoma Vernon, ɗo o yi’data o wondata e banndiraaɓe ɓee, o jaɓɓiima ɗoo, ummiiɓe e gure goɗɗe ko wa’i no Le Havre, Paris e Sergie, aɓa ngari ñaagaade yo o yetto ɓe ; tawi Italinaaɓe, gila o immaaki, ɓe ceeraani e naamnaade jettagol makko toon. Ina gasa so won ko ke-wuyi heen, ma min ngartan on heen.

En mbaawaa waasde joofaade hade men rowde, hikka, buleet, Ceerno ina huma lewru koorka nduu ko wonaa e Madiina Gunaas. Ko addani ceerno Abdul Aziiz Kan wi’de : « Ceerno nani ɗoo e Farayse, kono kala gannduɗo mo ina anndi hanndi oo ko Madiina o woni ! »
Banndiraaɓe, sonndu nani dow, kono gite mum nani les ! so ɓerɗe ina ngondi, ceertugol ɓalli woɗɗaani. Yo jam jogo min jogoo on, to mbaawɗen wonde fof.

 

Dewindagol : Caafal,
e ballondiral e Ceerno Alha-san Joob, mo Loobaali, ko mawɗo e njaatigeeɓe Dental ngal to Farayse.