aala gasii, haala maayii e jamaagu hee to diŋiral Soccer City, Afrik Bŋ Worgo e wattan kawgel fuku winndere. Espaañ wontii comuɗo winndere caggal kawgu mum e dow Holannda. Hewi ko wiyaa wonde hikka ko hitaande Espaañ, ɓee ena ngoonda, ɓaya ena tiima walla ena piya ceede! Goonga hootii to tijjinooɓe nawtugol Espaañ raay e gadanol maɓɓe yahde wattan kawgel winndere. Ko Iniesta tonngiti Espaañ e hoƴom 117 rogere ɓeyditere caggal nde ɓe ndoŋkondiri e Holannda e doge ɗiɗi lenaaɗe ɗee.

Ko ngol waɗti go'o ko Espaañ nawata raay e kawgel winndere, ko ngol waɗti go'o kadi ko eɓe njaha wattan. Kono kadi ko ngol waɗti laabi ɗiɗi eɓe mbeeyna kubeeri caggal nde ɓe kawi e kawgel Orop 2008. Ngati Espaañ ena haandi e nawde oo martaba sabu ko kamɓe tan nduumii e heɓde njaltudi maɗndi faayiide e kawre maɓɓe ɗe ɓe petti ɗii duuɓi kala. To baŋnge Holannda, daartol firlitiima e maɓɓe nde ngal kawral woni laawol tataɓol ko eɓe kawee e wattan kawgel winndere. Ko goonga fetto maɓɓe yaltiraani no hono kawre maɓɓe gadane ɗee haa teeŋti e nde ɓe piyi Arjentiin baral (4-0). Kono ɓe koriima yettaade lajal Espaañ so duƴƴude sahaa kala e duñtorde tekkunde. Espaañ kadi waawaa wiyeede ɓuri addude fetto yuɓɓungo sabo kamɓe ne ɓe ndillinaani sabaabu e kawral ngal so wonaa laabi seeɗa! Ko e hoƴomaaji battindiiɗi Iniesta heɓi bal ena teeli baŋnge ñaamo, o sokki bal e nder gacculi sahnga nde sikkanoo Epaañnajo ena oorndii. Gulaali ngulli, Espaañ summbi. E hoƴomaaji battindiiɗi ɗii, Holannda wiyi ena haɓtoo seeɗa kono ñebbe ndefaama!

Kawgel Afrik Baŋ 2010 waawatano welde tawi Nelson Manndelaa tawaaka! Gorko ɓurɗo lollude e hohooɓe winndere ndee arii njuuraade renndo ngoo e diŋiral ngal omo wonndi e jom suudu makko e satiiɓe mo. Nelso Manndelaa mawnii etee ɓanndu nduu welaani no feewi, yanti heen taanigel makko ena ruttii e balebale uddital kawgel ngel. Ko ɗum waɗi gargol makko hannde ko huunde teŋskinde no feewi. O jaɓɓaama jooɗngal e jaɓɓule sabu tooweendi makko e nder daartol Afrik, daarton winndere ndee no fotiri.
Haŋkadi fayaa ko to Beresiil e hitaande 2014, hooto mo yahdi heen sabu kadi ena ɗaminaa ko kawgel manwgel wonoyta. Afrik noon heɓii wune mawɗe e ngel kawgel sabu leydi Manndelaa hollii ngati alaa ɓurɓe ɗum'en waawde yuɓɓinde dille mawɗe bayɗe hono kawgel winndere fuku. Yo en tawtore kawgel 2014 tawa kadi Afrik ena hooynii, ena ɓeydii tiiɗde ngam martaba hannde oo ena meeɗa artude e duunde men!