ay so gasaani ne, ɓadiima: kawgal winndere 2010 to Afrik Baŋ Worgo heɓii ɗo goonga e fenaande ceerti haa laaɓi: battanal, yuman kawre ena fetta ñalnde Dewo 11 Morso e diŋiral Soccer City to Johannesburg. Caggal nayaɓe-wattan hakkunde Almaañ e Arjentiin (4-0); Espaañ e Paraguwaay (1-0); Holannda e Beresiil (2-1); Gahaa e Uruguwaay (pen; 4-5), ɗiɗaɓe-wattan ɗee mbelii haa wooroo sabu diɗɗe mawɗe e ɗe tijanooka hawrude. Ga'i amerik-worgonaaɓe ɓee, hono Beresiil e Arjentiin pukkiima muusngol sabu maɓɓe ɗaminanoode eɓe nawa raay e kawgel ngel.

Diɗɗe Orop mbeejnii hikka so yaltineede law e kawgel ngel haa ɓerɗe puɗɗii sikkitaade mbar wonaa Amerik Baŋ Worgo jogori kadi ɓaaftude martaba oo fof sabu maɓɓe wonde diɗɗe nay yettiiɓe e nayaɓe-wattan ɗee. Maradonaa e Kakaa kootii e nimsa mawka Alla e kosgol maɓɓe wonde bettere sabu ɓe puɗɗorii ko doole gila kawgel ngel fuɗɗii. Waɗnoo-ɓe ɗaminaade kadi ma ɓe njaltu hawɓe ko Oropnaaɓe meeɗaa nawde karaŋ wiinndere oo nde kawgel ngel yuɓɓinaa caggal Orop! Ngati daartol reftaaki hoore mum sabu ko ngol-ɗoo laawo woni go'o nde Orop nawata raay tawa wonaa leydi Orop yuɓɓini kawgel.
Ko Beresiil e Arjentiin muusaa koo fof, heɓataa nimsa Afrinaaɓe no potiri e kosgol Ganaa e nayaɓal-wattan ngal ɓe pettidie Uruguwaay. Ganaa tamii fetto ngoo haa ɗo kawral ngal wiyata ena wafani ɓeyditte. Ko ɗoon gooto e Uruguaynaaɓe jaɓɓorii bal junngo e ɓoggol lajal ngal. Ñaawoowo oo wutti fettannde penalti. Haala maayii, enen fof en njenanaama Ganaa ɓennii so hokkeede penaltii e wattan hoƴom kawral ngal. Kadi yaakaare ena mawni so ndesndaaɗo fiyannde ndee ko ŋanaa... Eh bone-jam yoo!, Gyan fiyi bal e salndu!! en mbooraama, gulaali haame ngulli. Ngati en mbooraama, Uruguwaay summbii sabu liital pusgu wuttanii-ɓe, Afrik hosaama, Afrik dicciima kono yanaani. Haa goɗngol e bawɗe Geno kadi.
Ɗuum wont-ii hanti daartol. Ngon-ɗen ko e jaamaanu fuku keso; jamaanu mo diɗɗe ɗiɗi ɗe meeɗaa nawde karaŋ winndere ndee kawtitdta e wattan jogorɗo waɗde faayiida! Holannda yahii wattan laabi tati e daartol mum: 1974, Almaañ fiyi-ɓe; 1978, Arjentiin fiyi-ɓe. Gila ndeen, alaa kogasi hay so tawii pelleeɗe maɓɓe bayɗe hono Ajax njiilmii fuku Orop duuɓi. Espaañ, won wiyi-ɓe ko hikka woni hikka maɓɓe gila kawgel ngel yettaaki. Kono ɓa kollaani tawo mbaawka tiiɗka gila ɓe puɗɗii taƴre adannde, so wonaa tan eɓe malaa wune ɓennude. Ko 1-0 walla joɓɓi dawaaɗi ngoni hiraande maɓɓe e bottaari. Hay kawral maɓɓe e Almaañ gasiri ko go'o e hay-baɗte! Mi yenanaaka noon fuku ko maleede wune tan roondii: so a fettataa moƴƴo, golle mbonat so ɓooyii juutde! Kono kunuɗe keewii e wowlude ñalnde kala wonde Espaañ wonata Compuɗo, yo a taw eɓe ñawndii ko ɓuri malu sabu Holaanda ko diɗɗal katojinngal e martaba mo ɓe ɗawaa ɗii duuɓi cappanɗe tati pawɗi. Laaɓi tan ko huunde: Orop jeyi kawgu hikka, Afrik heddodii e yaakaare, Amerik nawti mbonka e nimsaaji...