Baaba Maal e daande leñol ena njokki haa jooni e lappol mum'en to Dowlaaji Dentuɗi  Amerik. Ɓe kirjinii ñalde njeslaare 16 korse 2010 hiirde molanaande moolee to e Kolombis Ohaya Dowlaaji Dentuɗi Amerik. Hiirde ndee waɗɗaa ko hakkunde wuro kolommbis nokku biyateeɗo Newport Music Hall, saal jajɗo gameteeɗo, jimeteeɗo ɗo gaaciyankooɓe ŋanaaji keewii hawritde ena kirjina jammaaji belɗi, teskinɗi.

Hiirde ndee fotnoo fuɗɗaade ko waktu 7bo kono Jaalal leñol feeñi ko waktu 9 pawɗo taw yimɓe ɓee puɗɗiima haɓde. Nde Baaba naati diŋiral gal ena wonti Farba Mansuur Diine gawlo taanum Farba baggel no Baaba Maal wiyri, yiɗɓe ngulli, kelle njahdi e buubaaji, Baaba jooɗi, fooɗi Gitaar mum fuɗɗii tunngude "Pennda Neene am tiiɗno; tiiɗno-ɗa e suudu ma, tiɗnoɗaa e jom galle maa, kono tiiɗno ɗaa e leñol maa", jimol ngol ena yurminii, ena regii nde o gayni jimol ngol o firi faandaare jimol gol, e ɗemngal engeleere, O wiyi alaa fof ɗo leñol, leydi walla aduna o ɓamtortoo tawa wona rewɓe e sukaaɓe ɓamti-ɗum. Ko ɗum wadi yoo yimɓe fof mballu ɓe ngam nawde aduna oo yeeso, ƴelitde e ɓamtude ɗum.
Ina hiira huunde ndee ena ɓeydoo welde!

Baaba sifiima golle tiiɗɗe o waɗdi e terɗe Daande Leñol, mo woni kala o haali ɗo o ummodii e mum, ɗo ɓe ndewdi, korsa joom mum e ko o waɗata koo. Gooto e maɓɓe fof ena anndi ɗo ɓuri waawde ñiklude Baaba Maal kono nde o wulli innde Diine Gawlo, o deeƴti ko juuti, yimɓe ɓee mbiyi tem keɗtii. O ɓamti daande o wiyi cehilaagal so juuti Allah ena welaa kono goonga ena tawaa. Gila hay batte min ngonaani haa jooni, min ngondii e nguleeki, e jaangol, Mansuur mo yiɗirtaa dañal, añirtaa baasal kono Mansuur wona sehil maako ko ɓiyi yumma makko, sibu ñalde o sakkittoo yiyde yumma makko, Aissata Sammba Buubu Yaasin Waddu, omo waynoo yahde Farayse ngam beydoyde jaŋnde, Neene makko namdii-mo so tawii ko kanko Mansuur njahdata.
Baaba jaabii : hol no ɗum wonirta ? Min ko mi jaŋgoyoowo, mi alaa hay batte hay paas komi joɓanaado, mi naworaa kadi Mansuur, neene makko wiy-mo: cikkatnoo-mi kala ɗo mbaawɗa wonde ko e Mansuur ngondataa, Baaba meeɗaa yejjitde ngol kongol etee omo reeni kaan haala etee Mansuur hokkiimo ko waawa teettude so innirde mo ɓiɗɗo. Teskaade kala ganduɗo Baaba anndidii-mo e Mansuur Sek.
Baaba Maal holirii kadi kawisaaji hoddu, omo halda e mayru, Baru Saal ena tunnga cewɗi ena nduusa karlaaɗi ena jaaboo-mo. Pulaar wiy ko maayi so haali so yurminaaki ena hulɓini-ma.
Neɗɗo noon so yettii Allah ena foti yettude sabaabu ko e ɗii konguɗi ceniiɗi Baaba Maal rutti teddungal ngendiyankooɓe leñol fulɓe o limtii Murtuɗo, Saydu Kaan, Yero Dooro ekn.... sibu so pulaar yettiima hannde ɗo yettii ɗoo juuɗe maɓɓe ena heen njeyaa.
Baaba waynii kañum e Daande Leñol kono yimɓe ɓee ngulli mbiyi njoonaaka: o arti, o mo yima "Jamma jenngii koode ñaarii, ndoogu foynii, miin e maa tan keddinoo ɗoo jooɗo njewten"; yimɓe ɓee ena jaɓanamo.
So ko goonga Skorpa wiy : Rap o ena hanagaa;
Miin mbiimi ko hiirde nde ena haangaa .