Bowal weeyto leyɗeele Orop keewɗe uddaama caggal nde wumboldu ruppitii to leydi Islannda. Laaɗe diwooje beeyooje e Orop worgo kala kaɗaama diwde sabu ndoondi tekkunde e cuurki ɗi wummboldu nduu wukkiti e asamaan hee. Laaɗe diwooje ena kulaa so kawrii e ruulde ndee ena mbaawi waasde guccorɗe mum'en, lohna kisal ɗannotooɓe . Ko ɗum waɗi leyɗeele keewɗe ɓadiiɗe haaɗngo Rewo uddii boowe weeto mum'en ngam kulol diwooje ena mbaawi heɓde caɗeele bonɗe! Hohooɓe Angalteer kollitii wonde hay laana ngoota diwataa walla juuroo e leydi ndii e ñalngu Mawnde nguu.

Gila Naasaande ɓenndunde ndee, ko ɓuri 10 000 diwal haaytii e nder Orop. Hakke 50% diwe Oropnaaɓe ko ko njogori haaytude hannde fayde janngo. Teemedde ujunnaaji ɗannotooɓe nana toobi e ayrapooruuji Angalteer, Farayse e leyɗeele Scanndinaawiya (Suwed, Norwees, Finlannda). Kono wonaa boowe laaɗe Orop tan jaayaa! Laaɗe payɗe Orop nana ndiiñaa to boowe Amerik, Ostaraalii e Asii sabu ruulde bonnde wonde e haytude fayde fuɗnaange Orop. Wummboldu Eyjafjallajokull ruppitii ko ñalnde Njeslaare, nde wukkitii ununnaaji tonooji cuurki e ndoondi fayi dow asamaan. Ruulde ndee ena mawni, ena tekki haa kulol ena wonndaa so nde hawrii e diwooje, musiiba ena waawi jibineede heen.
Hohooɓe boowe laaɗe diwooje kollitii wonde ɗaminaaki ena artee e deeƴre ko adii Hoore-Biir so yaawii. Hay gooto meeɗaa yiyde ko wayi nih gila Siilo 2001 nde Al-kaydaa Biro horooɓe diwe laaɗe gonɗo to Briksel (Eurocontrol) ena kuli wonde maa caɗeele ɗee nduumo e nder waktuuji 24 garooji ɗii walla ɓura ɗoon. Ena hulaa kadi mawɗo leydi Amerik hono Barak Obamaa ena waawi waasde diwde ngam tawtoreede janaysa laamɗo Poloñ Lech Kaczynski e jom-suudu mum, maayɓe ñalnde Hooreè-Biir 10 Seeɗto caggal nde ndiwoowa maɓɓe yani to Riisii. Eɗen laɓɓitina wonde jangu kaan laana toɗɗondiraani e ruulde ndoondi nde kaalat-en ndee.
Wummboldu nduu wonaa tan e asamaan addi tanaa. E nder leydi Islannda, teemedde ndognaama ngam mooloyaade to ɓuri hisde e kulol ndoondi, jaynge e nguleeki. Ndu acciima kadi laƴƴere heewnde addude amooji e diiwaan Reykjavik, laamorgo Islannda. Kono e kaawis, boowe diwooje leydi ndii uddaaka sabu ruulde ndee tiindii ko fuɗnaange.