Hakkunde welsindaare e tiiɗde hoore, puccu wawaa dogde ɗoon Alla e yolnde ndee juutde. Ko welsindaare e ŋatde ngaddi joɓɓi dawaaɗi e kawral hakkunde Maali e Anngolaa ñalnde Dewo 10 Siilo to luanndaa. Ko Anngolaa adi yuɓɓinde kartaali tekkuɗi ngam yerɓinde duuñto Maalinaaɓe. Ɗo fuɗɗoode kawral ngal hakkunde maɓɓe ena peesondiri. Kono leelaani teskaa wonde maalinaaɓe ena njogii caɗeele to baŋnge diiwtugol baltuuji.

Maali fettata ko e seppo 4-3-3 e weernude Sidibé - Berthe, Diamouténé, Soumaré, Tamboura - A.Traoré, Diarra, B.Traoré - Bagayoko, Maïga, Kanouté.  Anngolaa ɓuri tekkinde ko hakkunde diŋiral ngal nde ɓe mberrni 3-5-2: Carlos - Marques, Kali, Zuela - Stelvio, Dédé, Xara, Gilberto, Mabina - Manucho, Flavio . Kawral ngal fuɗɗorii ko hakkille, gooto e diɗɗe ɗee kala ena meeroo dillinde duuñtooɓe goɗɗo oon. Ko e hoƴom 37 Flavio udditi alluwal ngal e ngaallo sorimori moolanaaɗo, sokki bal e salndu ɗiɗaɓuri Maalinaaɓe! Wonaani hoƴomaaji joyi tan haa Mabindaa junniti bal feewde e lajal Maali! Flavio hawri addii hoore, o wiyi bal oo ngaallo tut, gaccungol huɓɓi! Maali woni ko e diccude koppi walla? Ko ñaawoowo kawral ngal faabii Maali nde o wutti pusgu rogere adannde, yinde Anngolaa ena jooɗorii e dow reedu Maali bituuji ɗiɗi ɗi ngodaa gulwuli.
Kawral hurmitii e rogere ɗiɗaɓere! Maali ena jogii peeje kono ɗe keewaani: ko naatnoyde tan, goɗɗum alaa! Kono ko Anngolaa yontaa kadi hartaade! Maali horiima riiwtude bal e hoƴom 68 haa Bakayoko aanndi e hoore mum, furgi e Gilberto! Ñaawoowo telɓaani hay majaango, o joopii toɓɓe penaltii ndee! Maali dawii bonngol nde Gilberto e hoore mum luujii bal sawndo, sokki ngaari tataɓiri! Diŋiral ngal ruppitii jaynge e gulaali! Anngolaa naatirii kawgel ngel doole. Ena haalee gasaani e hoƴom 73, Seydu Keytaa jawlii mayoo Gilbertoo, liɓi-ɗum e hakkunde gallol Maali! Penaltii, wuttu kadi deenoowo kawral ngal! Ngol laawol, ko Manucho ŋaarnii haa yetti bal, wiyi ɗum e nder gaccungol Sidibe sokku! Bone ko ɗoo haaɗata: 4 e 0 haŋkadi hay gooto waawaa heftaade Anngolaa.
Kono ko waasde anndude Maali so sikkude ɓe njaɓrii Alla. Maali finii, finnii, umminii kartaali garɗi sahnga nde hoƴomaaji keddiiɗi e kawral ngal natti heewde. E hoƴom 78 Ko Yatabare ustii yolnde hakkunde maɓɓe e Anngolaa hade Konaate naatnude ngaari ɗiɗaɓiri Maali. Ko ɗoon kawral ngal ɓeydii welde. Anngolaa sikkii ko ɗoon haaɗata, hay so Maali artii haa 4-3, ko defanoo hakkandi ɓenndii, poolgu waɗii. Kono Maali seeraani e hartaade haa e hoƴom 94 nde Keytaa naatni tataɓiri. Haŋkadi laaɓii Anngolaa woni ko e waasde toɓɓe mum tati ɗe yenanaa ko e jayba mum mbaalalta hannde!, Kono Maali jaɓaani. Ko Yatabare kadi jaɓɓii bal ena ummii e Carlos, duuñtuɗo junnital ena ummii baaŋnge nano, o luujii e nder gaccungol! 4-4! Hay gooto meeɗaa yiyde ɗum! Anngolaa maa ɓooy ŋatde junngo mum ena ficca sabu yeebaare nde ɓe njeebii haa ɓe udditani Maali damal yaakaare! Maali kadi waɗii golle tiiɗɗe, so salaade ferlude koyde jaɓa haweede, kawral gasaani. Ko laaɓi koo woni kamɓe fof ɓe ngoppii doole keewɗe e nder ngal kawral. Kawre maɓɓe garooje ko jogorɗe muusde!

Kuɗol Ibraahiima Saar

HELLO AMEN E FACEBOOK - Yantu e yiɗɓe Pulaagu.com to Facebook!

Niiwto ngol-ɗoo dokkol QR ngam yahde to hello Pulaagu e FACEOOK!
Scannez le code QR ci-dessous pour aller sur notre page FACEBOOK!

.::| GIƊO PULAAR - WALLU PULAAGU/ DONATE TO PULAAGU / AIDEZ NOUS! ||::..

Aidez-nous à mieux défendre le Pulaar en faisant un don...Mballee-min e koppore ngam ƴellitde Pulaar...

ON NJAARAAMA FULƁE...

HELLO AMEN E FACEBOOK - Yantu e yiɗɓe Pulaagu.com to Facebook!

Niiwto ngol-ɗoo dokkol QR ngam yahde to hello Pulaagu e FACEOOK!
Scannez le code QR ci-dessous pour aller sur notre page FACEBOOK!

.::| GIƊO PULAAR - WALLU PULAAGU/ DONATE TO PULAAGU / AIDEZ NOUS! ||::..

Aidez-nous à mieux défendre le Pulaar en faisant un don...Mballee-min e koppore ngam ƴellitde Pulaar...

ON NJAARAAMA FULƁE...

Tags : can 2010, Mali; Angola, coupe d'afrique, football, luanda, bamako

Evaluation utilisateurs

   (0 vote)