Aŋngolaa ubbii arsuko Senegaal e laawol mum fayde e taccugol nayaɓere ñalnde 27 Siilo. Worɓe Luanndaa piyii Senegaal baral sabu ko 3-1. Ko baasal mawngal ɗo Senegaal sabu ko kamɓe udditi alluwal ɗo Abdulaay Jaañ-Fay (hoƴom 20) nde Juuf udditi fiyannde fayde e gallol Aŋngolaa, Sulymaan Jaawara hoɓɓi ngaallo fayde e Fay, addi kañum kadi ngaallo, bal naati. Senegaal heɓi 1-0. Hakkunde diɗɗe ɗiɗi ɗee woniri noon haa rogere adannde gasi.
Ndeen ɓe ngartii e diŋiral, ko ɗoon Senegaal wayri jam. Aŋngolaa happii bal, wiyi woppataa. Hoƴom kala eɓena e ɓoka e gallol Senegaal. Falotooɓe Senegaal ɓee koriima duuñtude-ɓe, weeyo ngoo woni ko e jiiɓaade!

Ko kartotooɗo Aŋngolaa Manucoo (pettoowo to Manchester) fuɗɗi waŋngo ngoo. E hoƴom 50, o udditinaa fiyannde moolanaande ummaade e Ze Kalanga, ko ɓurdo arde e ngaallooji o hoɓɓi, Silɓaa yiyaani nde bal oo sokkii nder gacculi.... Alluwal memlini (1-1).
Fettooɓe Senegaal mbayi no weftaaɓe, ɓe korii falaade hartotooɓe Aŋngolaa haa woni. Laawol ena udditii, ena yaajani hoore mum. Ko Kalanga arti sokkude ɗiɗaɓiri mum e hoƴom 67 (2-1). Gacculi Senegaal ena ruppitii jaynge ñifaani, Amado Flavio taarii falotooɓe ɗiɗo Senegaal, wiyi bal e lajal Silɓaa meƴƴu! Ndeen woni 3-1, haŋkadi hulaa ko gila ɓe njokkitirde Senegaal ga'i goɗɗi. Ko woni ko wuttaango pusgu ena dannda won e sahaaji... Sengaal horfiniima, barooɗe coŋngaama, poolaama...
Nguu kawgu ena jogori dillinde Senegaal no feewi Alla e leydi ndii joganoode ɗaminaare e ngel kawgel hikka. Habraama nih wonde Coftinoowo Senegaal, hono Hanriy Kasperczak woppii golle mum e diɗɗal Senegaal. Ena laaɓi caggal ndee boomaare, maa heewɓe njiɗ yo o riiwe!
Senegaal suwaa tawo hoseede sabu ko maa ñalawma baɗtano oo fettee. Yo Alla wallu barooɗe hakkunde mum-'en e Afrik Bŋ Rewo!

Kuɗol Ibraahiima SAAR

Tags : can 2008, angola, sénégal, Kasperczak

Evaluation utilisateurs

   (0 vote)