Daɗndo werlaaji e motooje ɓurngo lollude, ɓurngo juutde e muusede e daɗndooji ena jogori ŋaarnaade fayde Dakaar. Hitannde kala, 570 dognooɓe ummootoo e duunde Orop ngam yande e laawol tacoowol worgo Afrik, Muritani, Maali (sahaaji) e yettoyaade Dakaar, ɗoon woni sulmitorde. Otooji ñalla dogde e nder ladde, ena nduƴƴa e kaaƴe, ena iroo e ceene, ena lofoo e beeli e caanli. Dognooɓe ñalla wappaade poobe, kulle ladde e caɗeele!

Hikka kadi, diidol laawol fayde Dakaar wonaa ndiyam ɓuuɓɗam! Ɓuri heen huleede fof ko yolnde taccunde leydi Muritani ndee! Ko doge jeetati nde waɗi ummaade Ataar, rewde Nuwaasoot, Nuwaadiibu, Tiijikja, Kiifa, yaltirde tolno Sen-Luwii (Ndar) to Senegaal. Heewɓe e seeɗtiiɓe joljole baɗnooɗe to Eeleega haa faraysenaaɓe nayo mbaraa, ena paayi nde ɗeen dille ngartirtaa kulol e daɗndo ngoo. Kono ɗum fof e faaynude-ɓe, dogooɓe heewɓe ena koolii howhowɓe daɗndo ngoo sabu kuwle timmuɗe lelnaama ngam toppitade kisal maɓɓe e nokkuuji kuleteeɗi ɗii. Fiɗnde mum ko laawol ngol waylaaka hay diraa. Laaɗe diwooje e elikopteeruuji ena njogori weeyde e laawol daɗndo ngoo ngam horde kisal werlaaji e dognooɓe kala.
E duuɓi ɓennuɗi ɗii, laabi keewɗi daɗndo ngoo ena hawra e caɗeele haa won e taƴe ndottee e laawol ngol. Ko ɗum jolnoo saanga nde Cad woni e wolde e hitaande 1992. Kono ko e hitaande 2000 kulhuli saram-boomaagu e leydi Niger  addi daɗndo ngoo yowaa hakke balɗe joy; kisa ko laaɗe diwooje taccini daɗndo ngoo ummaade Nijeer fayde Libi. Ko ɗiin kulhuli mbaɗnoo kadi taƴe ɗiɗi e yolnde daɗndo 2004 ndotaa e nder leydi Maali. Rawane, daɗndo ngoo rewaani Maali sabu fedde Salafiy-en to Alasaeri hulɓinde maa wood ko waɗi dogooɓe ɓee.
Pari Dakaar wontii haŋkadi aadi. Heddii ko dogooɓe ɓee ndeentoo kadi gila piɗtaali mbonde e laabi sabu heewii ko boomii e duƴƴanɗe (accidents) gila daɗndo ngoo sosaa.
Hol ko daɗndo ngoo addante leyɗeele men? Mbele daɗndo ngoo ko fijirde tan hakkunde alɗuɓe arooɓe ena kaljina laabi men? Oɗon ñaagaa nde ngaddaton heen jowe mon (commentaires). Ɗum noon, kawree e tappirɗe mon!
Yoo Alla won ballo!

Kuɗol Ibraahiima SAAR

Laawol ngol ko nih diidorii hikka:

Tags : News, Dernières news, PARI-DAKAAR 2008: Daabaaji kaɓɓaama!Rallye, Paris Dakar, moto, auto, caravane humanitaire.

Evaluation utilisateurs

   (0 vote)