ande 23 duujal 2012, fedde huutortoonde ɗemngal farayseere e nder winndere ndee (francophonie) yuɓɓinii kewu mawngu to Kinsasaa (laamorgo Konngo) ngam rokkirde njeenaari Kadimaa hitaande 2011, Tawii  faatundi e ɓamtugol ɗemɗe afriknaaje heɓi ɗum ko Aliw Muhammadu.

Aliw Muhammadu ko ɗemɗiyaŋke kuɓɓuɗo, kooniŋke ɗemngal pulaar, jannginoowo dowrowo to duɗal « INALCO ». Ngal ɗoo duɗal, ko duɗal ngenndiwal ɗemɗe e finaa-tawaji fuɗnaangeyaŋkeeji to Pari. O jannginta e maggal ko celluka  Pulaar. Ko kanko laatii e maggal hannde jaalal pulaagu, caggal nde Alfaa Ibiraahiima SOH wirnii. Omo walla winndiyaŋkooɓe heewɓe muulde defte mumen, gila e Pulaar noon haa e ɗemɗe goɗɗe afriknaaje.

ajo kassataya (www.kassataya.com) ena bismii-mi e yeewtre ganndal nganndi (informatique) lewru kala laawol gootol. Bismotoo yeewtere ndee ko musidɗo men Khaly Thiam gonɗo to Memphis, Dowlaaji Dentuɗi. E nduu lewru Korse du ngon-ɗen yeewtere men ko ñalnde Dewo 3 Korse 2012. Woni toɓɓere yeewtere ndee ko jaltugol wanngorde Firefox (yamre betaa) e ɗemngal Pulaar tijjangol e yontere aroore ndee.

ammee Lih ko gooto e annduɓe Fulɓe ɓurɓe seeɓde wonande coñce e miijtiyaŋkaagal. O jeyaa ko leydi Senegaal, wuro ena wiyee Mbooyo (Fuuta-Tooro). Hammee golliima e rajooji haa e teleeji. Ko e 2STV, calol tele ɗiɗaɓol leydi Senegaal o gollotoo hannde. Golle makko e jaŋde makko e jaayndiyaŋkaagal haɗaani omo daranii ƴellitde coñce e wiɗtude fannuji mum ɓurɗi wirnaade. Ko gooto e ɓe njogi-ɗen yaakaare mawnde to banngal ubbitde gannde toowɗe e ɗemɗiyaŋkaagal Pulaar.

Fartaŋŋe mo PULAAGU.COM heɓi yeewtitde e makko oo saabii ɗum ko jaltugol lefol jime ngol o bayyinie lebbi ɓennuɗi ɗii. Ehey, Hammee Lih ko yimiyaŋke ŋanaajo mo wonaa puɗɗotooɗo jooni sabu en njiyi leppi makko ɓennuɗi e Youtube walla e fannu ojoo. So golle beyɗe hono nih teskinde njaltii, kadi ko e kuɗol makko e daande makko njaltinaa, alaa e sago min ndennda ɗum e Fulɓe no ndiidorinoo, teeŋti noon e yilliyaŋkooɓe lowre men... Keɗto-ɗen ceerno Hammee...Ahaa, miɗo reentina-on noon: Pulaar oo ko tekkuɗo sanne hay so ko hunuko Lihdo yalti...

inndude Pulaar e ordinateer nattiino wonande renndo men caɗeele gila e hitaande 1996 tuma nde njaltin-ɗen alkule gadane e Windows. Ɗeen alkule njiiliima e winndere ndee kala haa hawri. Hannde eɗe kuutoree e nukkuuji kala: defte ko kañnje mbinndirtee, jaayndeeji ko e majje e geɗe goɗɗitiiɗe. Caɗeele ngonnoo ko e naatnude alkule e ordinateer tawa ena yalta e Enternet. Ɗum kadi peeje mum hannde keɓii duuɓi ko njiytaa. Ena heddinoo noon kala leydi njogiindi Tappirde (kalawiyee) heeriinde, ko maa waɗanee tappirde Pulaar mgam waawa huutoreede ɓeen yimɓe wonɓe e ɗeen leyɗeele. Ɗum woni hannde golle ɗe njettinten banndiraaɓe Fulɓe winndere ndee kala. Ngati tappirde jaaɓdunde e Winndows Farayseere (FR) e Englereere Amerik (US) njaltiino ko neeɓi seeɗa. Hannde, en naatnii leyɗeele goɗɗe ɗo Pulaar daranaa: Itali, Espaañ e Purtugaal.